Stellenbosch Gemeente het in 1999 tot stand gekom toe dr Theo Geyser, op daardie stadium van Randburg Gemeente, na die Stellenbosch AGS-gemeente beroep is. Die kerk was geleë op die hoek van Andringa- en Crozierstraat.

Hierdie gemeente was sukkelend en het ’n bywoningstal van 39 gehad. Die gemeente het ’n nuwe visie ontwikkel en ’n strategiese proses begin waardeur ’n nuwe benadering tot bediening gevolg is. In hierdie tyd het die gemeente begin groei en het ons drie keer na groter fasiliteite getrek om die groei in bywoningsgetalle te kon akkommodeer. Nadat Stellenbosch Gemeente ’n lening aan Paul Roos Gimnasium gemaak het om te help om hul nuwe saal te voltooi, word ons eredienste sedert Oktober 2001 in hierdie saal gehou. Die bywoning het intussen tot 2000 mense per Sondag gegroei.

Stellenbosch Gemeente volg dieselfde benadering as sy sustergemeente Mosaiëk in Johannesburg wat in sewe jaar tot ’n lidmaattal van 4 500 gegroei het.